„Platt maakt“ As en Kattkötel in ’t Düüstern
Ob man zur Arbeit muss oder zur Schule: Um diese Jahreszeit ist es auf dem Weg dorthin noch dunkel. Das birgt Gefahren, muss es aber nicht, erklärt Antje Lübben.
Mörgens is dat düüster. Pickedüüster. De Minsken mutten in dat Düüstern na hör Arbeid of na de School hen. Faken seh ik denn up mien Padd Kinner, de kien Lüchten an hör Fahrraden hebben. Of junge Lüü, de mit en E-Scooter sünner Lücht dör de Straten susen. Tominnst hebben de Scooter-Brusers meesttieden en Mobieltje in d‘ Hand. Is kien Lücht, man lücht ok! Ik hebb denn Nood. Hangen de all neet an hör Leven?
Wenn een maal genau henhören deit, denn sünd de Minsken smaals bang, dat de Polizei hör anhollen deit. Dat se denn düchtig wat to hören kriegen un för dat Fahren sünner Lücht en Straaf betahlen mutten. Ok för Radfahrers köst dat gau 20 Euro of mehr.
Wo faken seh ik hier in uns Stadt un umto meest junge Minsken up Rennraden of Mountainbikes, de van en Lücht an ’t Rad neet besünners vööl hollen. Düüster antrucken mit düüster Joppen, düüster Mützen un düüster Büxen. Un ok geern in dat Düüstern unnerwegens. Klaar, de mutten ja ok na d‘ Arbeid of School hen. Düüsterblau un Swart, dat sünd hör Klören. Hebben de all en Orgaanspennerutwies? Maken de hör Schutzengels stillkens Överstünnen? Wi willen dat Beste hopen.
Egentlik kunn dat doch heel eenfach wesen. Vandaag gifft dat Lüchten to anklippen. LED, lüttjet un praktisk. De kann een överall licht anbrengen un överall licht mit hennehmen. Kieneen van uns mutt mehr mit Karbidlampen an sien Fahrrad up Tour!
As dat in Düütskland so is, mutt een daar natürelk alltied up achten, dat disse Lüchten ok för de Stratenverkehr tolaten sünd un annern neet blenden. An en Rad sünd to en Bispööl blot Lüchten mit en K-Nummer up Stee.
Dat gifft vandaag Helmlampen, Warnwesten, Reflektoren un Blinkies. Sünd ok wunnerbaar Geschenken to Sünnerklaas. Ik hebb maal lesen, dat dat annerswaar sogaar Busfahrkaarten geven deit, de en Rüggsied hebben, de in dat Düüstern düchtig reflekteert. Ik weet neet mehr genau, of dat in Norwegen, Sweden of Island was. Tominnst in en Land, waar dat lang Tieden van ’t Jahr düüster is. Wenn een daar in pickswarte Nacht an de Bushaltestee steiht, denn wist een up disse Aard un Wies de Busfahrer mit de Reflektor-Rüggsied van de Fahrkaart an, dat een geern in sien Bus mitfahren much. So kann de Busfahrer seggen: Kiek, he glimmt as en Kattkötel in ’t Düüstern.
Lücht an, Lücht ut
Updoon – neet wegdoon!
Vööl Bewegen in de Naberskupp
